vithaikulumam.com
அறிமுகம்

விதை குழுமம் : ஓர் அறிமுகம்

விதை குழுமம் உருப்பெறுகின்ற சமகாலத்தில் நிலவிய கலை இலக்கியமும், சமூக அரசியல் செயற்பாடுகளும் நேரடித் தொடர்பற்றனவாக இருந்ததையும் சமூக அரசியல் புரிதல்களின் வழி செயல்வாதமாக முன்னெடுப்பதில் பெரும்பான்மையினருக்கு இருந்த தயக்கத்தையும் கருத்திற்கொண்டு அதிலிருந்து விலத்தி சிந்தனைக்கும் செயற்பாட்டிற்குமான ஒரு கூட்டிணைவாக விதை குழுமம் ஆரம்பிக்கப்பட்டது.

சமூகம் நெருக்கடியான சூழ்நிலைகளை எதிர்கொள்ளும்போது அந்த நெருக்கடிகளை எவ்வாறு எதிர்கொள்வது என்ற பரிந்துரைகளை அறிவார்ந்த சமூகம் வழங்குவதும் தான் கொண்டியங்குகின்ற அறிவுமுறைகளுக்கு ஏற்ப சமூகம் அதனை உள்வாங்கும், நிராகரிக்கும் அல்லது தனக்கேயுரிய வடிவங்களை உற்பத்தி செய்யும் வழக்கமே நடைமுறையில் உள்ளது.  கருத்தியல்களின் அடிப்படையில் அறிவார்ந்த சமூகம் வழங்குகின்ற பரிந்துரைகளையும் நடைமுறையையும் இணைப்பதில் இருக்கின்ற சவாலே இங்கு இனங்காணப்படுகின்றது.கருத்தியலையும் நடைமுறையையும் கவனத்திற்கொண்ட செயற்பாடே நீண்டகால அடிப்படையில் பயனளிக்கக்கூடியது.

இந்தப் பின்னணியில் ஆரம்பிக்கப்பட்ட விதை குழுமம், அதன் முதலாவது செயற்பாடாக சுன்னாகம் நிலத்தடி நீரில் கலந்த மாசு தொடர்பிலான போராட்டத்தில் தன்னாலியன்ற பணிகளை ஆற்றியது.இந்தப்போராட்டத்தில் விதைகுழுமம் வலியதான அனுபவங்களைப் பெற்றுக்கொண்டது.விதை குழுமம் ஒருங்கிணைத்த போராட்டத்தின் பகுதியாக நல்லூர்க் கந்தசாமி கோயில் முன்றலில் இடம்பெற்ற உண்ணாவிரதப் போராட்டத்தில் அமைப்பின் சார்பில் போராட்டத்தை முடிவுக்குக் கொண்டுவந்த முறை பொதுவெளியில் கடும் எதிர்வினைகளைத் தோற்றுவித்தது. குறிப்பாக தமிழ் அரசியல் தரப்பிடம் அல்லாமல் சிங்கள ஆளுனர் ஒருவரின் வாய்மொழி வாக்குறுதியுடன் போராட்டம் முடிவுக்குக் கொண்டுவரப்பட்டது என்பது. குறித்த விமர்சனங்கள் பற்றி உரையாடும் பொதுவெளிக் கலந்துரையாடல் அதன் பின்னர் இடம்பெற்றது. அமைப்பு ரீதியிலான ஆரம்பகட்ட அறிவுடன் இயங்கிய குழுவிற்கு, முதலாவது செயற்பாடு பிரமாண்டமாகவும் பல்வேறு தரப்பினரை இணைத்துச் செய்யவேண்டியதுமாக இருந்தது. இப்பாரிய பொறுப்பைக் கையாளமுடியாமல் அமைப்பு பல நெருக்கடிகளை எதிர்கொண்டதுடன் மிகக் கடுமையான எதிர்வினைகளினது அழுத்தங்களினதும் காரணமாக அதன் இயக்கம் சற்றுத் தடைப்பட்டது.

அந்த அனுபவங்களின் துணைகொண்டு விதை குழுமம் பின்வரும் செயற்பாடுகளை முன்னெடுத்தது

இங்குள்ள இனமுரண்பாட்டைக் கற்பதற்கும் பிரதான முரண்பாடுகளை அடையாளம் காணவும் “இலங்கை இனமுரண்பாட்டை விளங்கிக் கொள்ளல்” என்ற கற்கை வட்டம் ஆரம்பிக்கப்பட்டது. அதனைத் தொடர்ந்து இதர கலை இலக்கியச் செயற்பாடுகளுடனும் சமூகம் சார்  இயங்குதல்களுடனும் தொடர்ந்து பயணித்தது.

  • மாற்றுப்பாலினரின் உரிமைகள் பற்றியதும் அவர்கள் அமைப்பாகுவதன் தேவை குறித்ததுமான கலந்துரையாடல்களை ஒருங்கிணைத்தது.தொன்ம யாத்திரை’ என்ற பெயரில் மரபுரைமைகளைப் பாதுகாப்பதும் அவற்றைக் குறித்து அறிவதும் விழிப்புணர்வாய் இருப்பதும் பற்றி தொடர் செயற்பாடுகள் முன்னெடுக்கப்பட்டன. இன அழிப்பின் வடிவமாக இடம்பெறும் மரபுரிமை அழிப்பு, மக்களின் அறியாமையைப் பயன்படுத்தின் இலாபமீட்டும் நோக்கில் மரபுரிமை அழிப்பில் ஈடுபடும் நபர்கள் மற்றும் சக்திகள் ஆகியவற்றிடம் இருந்து நமது பிராந்திய வளங்களைப் பாதுகாப்பது என்ற நோக்குடம் தொன்ம யாத்திரை எனும் திட்டத்தை உணவு, இசை, வரலாறு, இயற்கை போன்ற விரிவான தளங்களுடன் ஒன்றிணைக்க முடிந்தது.  தொன்ம யாத்திரை எனும் பெயரில் ஆரம்பத்தில் துண்டுப் பிரசுர வடிவில் தொடங்கி படிப்படியாக வளர்ச்சியடைந்து இதழ் ஒன்றும் வெளியிடப்படுகின்றது.புதிய சொல்’ என்ற கலை இலக்கிய எழுத்துச் செயற்பாட்டிற்கான இதழ் ஆரம்பிக்கப்பட்டதன் மூலம் ஆழமான உரையாடலுக்கான களம் திறக்கப்பட்டது.இக் காலப்பகுதிகளில் பல்வேறு கலந்துரையாடல்களை விதை குழுமம் ஒருங்கிணைத்ததுடன் வெவ்வேறு கலந்துரையாடல்களின் பங்கேற்றும் இருந்தது.பின்னர் கேப்பாபுலவில் உள்ள பிலக்குடியிருப்பு எனும் கிராம மக்களின் நிலமீட்புக்கான போராட்டம் தொடர்பில் ”கேப்பாப்புலவு : நில மீட்பிற்கான மக்கள் போராட்டத்தின் கதை” என்ற பிரசுரம் வெளியிடப்பட்டது.பின்னர் யாழ்ப்பாணத்தில் உள்ள காட்டுப்புலம் எனும் கிராமத்தில் ஒரு சிறுமி பாலியல் துஷ்பிரயோகத்திற்குப் பின்னரான கொலை தொடர்பிலும், கிராமங்களில் உள்ள சமூக நிலமைகள் தொடர்பிலும் தொடர் கலந்துரையாடல்கள் “காட்டுப்புலம் : ஒரு சமூக உரையாடல்” என்ற தலைப்பின் கீழ் இடம்பெற்றது.அமைப்பின் செயற்பாட்டாளர்களில் ஒருவரான பிறைநிலா கிருஷ்ணராஜாவின்  மாற்றுப்பாலினரின் சமூகச் சிக்கல்கள் பற்றிய ஆவணப்படம் ”நாங்களும் இருக்கிறம்” என்ற பெயரில் வெளியிடப்பட்டது.எமது அமைப்பின் செயற்பாட்டாளரும் சிறந்த வாசகருமாகிய குமாரதேவன் அவர்களின் மறைவினை ஒட்டி “வாசகரும் சக பயணியும்” என்ற சிறு நூல் வெளியிடப்பட்டது.இவை பருமட்டான அளவில் அமைப்பின் செயற்பாடுகளையும் அதன் செயற்படு முறைமையையும் விளங்கிக்கொள்ள நாம் தொகுத்திருக்கிறோம். பல்வேறு காலகட்டங்களில் தொய்வும் சோர்வும் இருந்தாலும் அமைப்பினை சுயவிமர்சனங்களுடன் சீர்செய்து  தொடர்ந்து பயணிப்பதற்குமான உறுதியுடன் நிற்கின்றோம்

    மின்னஞ்சல் – tovithaikulumam@gmail.comமுக
    நூல் பக்கம் -https://www.facebook.com/ourwings13

  • Related posts

    எனது மகள் கேள்வி கேட்பவள் – அறிமுகமும் உரையாடலும்

    vithai

    Leave a Comment